Prishtinë, 11 shtator 2024 – Prokuroria Speciale e Republikës së Kosovës ka ngritur sot aktakuzë në Gjykatën Themelore në Prishtinë – Departamentin Special, kundër 45 të pandehurve, përfshirë një person juridik dhe një person përgjegjës, për vepra të rënda penale që përfshijnë kryerjen e veprave terroriste, krime kundër rendit kushtetues dhe sigurisë së Republikës së Kosovës, financimin e terrorizmit dhe pastrimin e parave.
Aktakuza është ngritur kundër personave me inicialet M.R, B.S, V.T, D.M, V.R, U.J, M.J, V.A, A.M, L.S, V.D, V.V, S.J, M.K, U.M, T.V, D.V, V.J, S.P, N.S, M.V, S.R, M.R, M.A, ZH.C, K.D, S.M, M.S, A.J, R.G, I.M, G.Z, N.R, R.A, M.M, GJ.B, D.GJ, D.V, A.T, M.K, M.N, N.I, V.I, si dhe kundër personit juridik “R” dhe personit përgjegjës R.S.
Veprat penale të akuzuara përfshijnë:
- Kryerja e veprës terroriste: Sipas Kodit Penal të Republikës së Kosovës, neni 129 par. 3 lidhur me par. 1 dhe neni 128 par.1, pikat 1.1, 1.3, 1.7 dhe 1.10.
- Veprat e rënda kundër rendit kushtetues dhe sigurisë: Sipas nenit 126 par. 1, nënparagrafi 1.1 dhe 1.2 lidhur me nenin 118 të Kodit Penal të Republikës së Kosovës.
- Lehtësimi dhe financimi në kryerjen e terrorizmit: Veprimet e pandehurit M.R. përfshijnë financimin e akteve terroriste, sipas nenit 131 të Kodit Penal, në lidhje me nenin 57 të Ligjit për parandalimin e pastrimit të parave dhe luftimin e financimit të terrorizmit.
- Shpërlarja e parave: Të akuzuarit M.R., personi juridik “R”, dhe personi përgjegjës R.S., janë të akuzuar për pastrim parash, sipas nenit 302 të Kodit Penal, në lidhje me nenin 56 të Ligjit për parandalimin e pastrimit të parave dhe luftimin e financimit të terrorizmit.
Sipas aktakuzës, të pandehurit kanë tentuar shkëputjen e pjesës veriore të territorit të Republikës së Kosovës, me qëllim që t’ia bashkojnë këtë territor Republikës së Serbisë. Gjatë këtij veprimi, si rezultat i dhunës së përdorur, ka humbur jetën zyrtari policor Afrim Bunjaku dhe është rrezikuar jeta e zyrtarëve të tjerë policorë dhe popullatës civile.
Prokuroria Speciale e Republikës së Kosovës mbetet e përkushtuar për ndjekjen penale të të gjitha rasteve që cënojnë rendin kushtetues dhe sigurinë publike, duke përdorur të gjitha mjetet ligjore për të siguruar drejtësi dhe siguri për qytetarët e vendit.
