Prishtinë, 15 tetor 2024 – Këshilli i Prokurorial i Kosovës (KPK), i udhëhequr nga Kryesuesi Ardian Hajdaraj, mbajti Takimin e 255-të, në të cilin diskutoi pikat e parapara në rendin e ditës. Vendimet që u morën në takimin e sotëm janë si vijojnë, me ç’rast Këshilli i Prokurorial i Kosovës:
1. Miratoi shpalljen e Konkursit për Kryeprokurorin e Prokurorisë së Apelit dhe konkursin për pesë kryeprokurorë të prokurorive themelore në: Prizren, Gjilan, Ferizaj, Mitrovicë dhe Pejë, nga data 21 tetor 202;
2. Themeloi dy panele vlerësuese për kandidaturat për Kryeprokuror të Prokurorisë së Apelit dhe për kryeprokurorë të pesë prokurorive;
3.Miratoi Rregulloren për Transferimin dhe Avancimin e Stafit Administrativ në Sistemin Prokurorial me propozimet dhe ndryshimet e bëra nga anëtarët e Këshillit gjatë këtij takimi, rregullore kjo, që hynë në fuqi nga dita e sotme;
4. Aprovoi Dokumentin e politikave të trajnimit dhe Planin i nevojave për trajnim për vitin 2025;
5. Caktoi prokuroren Merita Bina Rugova në detyrën e Udhëheqëses së Departamentit për Hetimin e Krimit të Organizuar në Prokurorinë Speciale me mandat katërvjeçar;
6. Aprovoi dorëheqjen e prokurorit Arianit Salihu nga detyra e Udhëheqësit të Departamentit të Përgjithshëm në Prokurorinë Themelore në Prishtinë;
7. Caktoi prokurorin Besart Mustafa në detyrën e Udhëheqësit të Departamentit të Përgjithshëm në Prokurorinë Themelore në Prishtinë me mandat katërvjeçar;
8. Liroi nga ngarkesa më lëndë në masën prej 30 përqindësh Udhëheqësin e Departamentit për Krime të Rënda dhe Udhëheqësin e Departamentit për të Mitur, kurse në masën prej 50 përqindësh Udhëheqësin e Departamentit të Përgjithshëm në Prokurorinë Themelore në Prishtinë deri në nxjerrjen e Udhëzimit Administrativ;
9. Refuzoi kërkesën e prokurorit Qazim Xharra për ricaktimin e tij në Prokurorinë Themelore në Prizren;
10. Aprovoi dërgimin e propozimit për lirim nga detyra të prokurorit Dushko Manitasheviq te Presidentja e vendit për shkak të arritjes së moshës së pensionimit;
11. Liroi deri më 31 dhjetor 2024 nga pranimi i lëndëve në masën prej 50 për qind prokuroren e Prokurorisë së Apelit, znj. Nazan Shero, e cila është anëtare e Komisionit për Vlerësimin e Performancës së Prokurorëve dhe
12. Autorizoi Kryesuesin Hajdaraj për nënshkrimin e Marrëveshjes së Bashkëpunimit ndërmjet Këshillit Prokurorial të Kosovës dhe Këshillit Gjyqësor të Kosovës për shkëmbimin e parcelës, e cila është në pronësi të KGJK-së te Pallati i Drejtësisë me ndërtesën e KPK-së në Objektin C te Pallati i Drejtësisë, e cila është duke u shfrytëzuar nga Prokuroria Themelore në Prishtinë.