Prishtinë, 29 korrik 2024 – Komisioni për Administrimin e Prokurorive, i kryesuar nga z.Jetish Maloku, mbajti sot takimin e radhës sipas agjendës së paraparë.
Në këtë takim morën pjesë anëtarët e Komisionit dhe të grupit punues për përgatitjen e Udhëzuesit për mënyrën e trajtimit të rasteve me kryerës të panjohur, përfaqësuesi i Zyrës së BE-së në Prishtinë, z.Mats Persson, Koordinatori i Komisioneve të Përhershme të KPK-së, zyrtarët e Njësitit për Shqyrtimin e Performancës së Prokurorisë dhe të Departamentit të Teknologjisë Informative të Sekretariatit të KPK-së.
Fillimisht, udhëheqësi i grupit punues për përgatitjen e Udhëzuesit për mënyrën e trajtimit të rasteve me kryerës të panjohur, Kryeprokurori i Prokurorisë Themelore në Prizren, Admir Shala, prezantoi draftin e Raportit për trajtimin e rasteve me kryerës të panjohur, përfshirë konkluzionet dhe rekomandimet përkatëse.
Anëtarët e Komisionit për Administrimin e Prokurorive, vlerësuan se Draftraporti mund të ndihmojë në standardizimin dhe përmirësimin e procedurave për trajtimin e këtyre rasteve, si dhe rekomanduan ngritjen e nivelit të cilësisë së të dhënave në Prokurorinë e Apelit, si dhe diskutuan edhe për vizitat që do t’i realizojnë në të gjitha prokuroritë e vendit, ku do të mbikëqyrin zhvillimin e procesit të punës përmes SMIL-it dhe do të identifikojë nevojat e infrastrukturës fizike.
