U.D. Kryeprokurori i Shtetit takoi raportuesen speciale të OKB-së për promovim dhe mbrojtje të të drejtave për lirinë e mendimit dhe shprehjes
Prishtinë, 4 prill 2023 – Ushtruesi i Detyrës së Kryeprokurorit të Shtetit, z. Besim Kelmendi, ka zhvilluar takim pune me raportuesen speciale të OKB-së për promovim dhe mbrojtje të të drejtave për lirinë e mendimit dhe shprehjes, njëherësh ligjëruese e Institutit ndërkombëtar dhe studimeve zhvillimore në Gjenevë, znj. Irene Khan, e cila ishte e shoqëruar nga bashkëpunëtorët e saj nga Zyra e Kombeve të Bashkuara - Komisioneri i Lartë për të Drejtat e Njeriut në Gjenevë.
Gjatë këtij takimi të dyja palët biseduan për lirinë e shprehjes në Kosovë, për rastet e nxitjes së urrejtjes dhe përçarjes, mënyrën e komunikimit më publikun, si dhe për rastet e kanosjes dhe dhunës ndaj gazetarëve.
Ushtruesi i Detyrës së Kryeprokurorit të Shtetit, z. Besim Kelmendi shprehu përkushtimin e tij për trajtimin më serioz të këtyre çështjeve, në veçanti trajtimin e rasteve të gazetarëve dhe vlerësoi lartë vizitën e znj. Khan në Institucionin e Prokurorit të Shtetit.
