Mbahet takimi i 189-të i Këshillit Prokurorial të Kosovës
Prishtinë, 3 nëntor 2020 – Këshilli Prokurorial i Kosovës, i drejtuar nga Kryesuesi Bahri Hyseni, ka zhvilluar mbledhjen e rregullt, të 189-tën me radhë, nën masat e mbrojtjes nga pandemia dhe përmes komunikimit në distancë, në të cilën ka miratuar një sërë aktesh dhe veprimesh procedurale nga fushat e përgjegjësive të tij kushtetuese dhe ligjore.
Takimi i sotëm ka filluar me dhënien e betimit të anëtarit të Këshillit Prokurorial të Kosovës nga radhët e Prokurorisë Themelore në Gjakovë, Armend Zenelaj, kurse në vazhdim është bërë aprovimi i listës së prokurorëve që do të shërbejnë në panelet hetimore lidhur me procedurën disiplinore ndaj prokurorëve.
Po ashtu, Këshilli Prokurorial i Kosovës ka marrë vendim për shpalljen e konkurseve për Kryeprokuror të Prokurorisë së Apelit dhe kryeprokurorë të prokurorive themelore të Gjilanit, Prizrenit, Pejës, Gjakovës, Mitrovicës dhe Ferizajt.
Me këtë kontekst, KPK-ja ka themeluar panelet vlerësuese për emërimin e Kryeprokurorit të Prokurorisë së Apelit dhe kryeprokurorëve të prokurorive Themelore të Gjilanit, Prizrenit, Pejës, Gjakovës, Mitrovicës dhe Ferizajt, si dhe ka themeluar komisionet për rishqyrtim.
